جمعاوى

موضوع: جمعاوى الخميس ماي 01, 2008 8:17 pm

جامعاوى بن المعلم زناتى حصله بلوك يارجالة

حصلى بلوك جامعاوى بن المعلم زناتى حصله بلوك يارجالة!!..
والبلوك كما جاء فى لسان العرب لابن عصفور: هو انك تلاقى العملية قفلت معاك...كل ما تيجى تمسك القلم وتحاول تكتب تلاقى نفسك عمال تصرخ وتقول شلت يدى...شلت يدى...خزاعة...خزاعة
أحيان كتير بقول إن دى فترة بتعدى على أى واحد عبقرى زيى....نجيب محفوظ حصله كده...توفيق الحكيم....أبوتريكة بعد اليابان...ده حتى شعبان عبد الرحيم جاله بلوك
لكن المشكلة إن الفترة دى طولت أوى...لدرجة إننى بدأت أحس إننى ضربت ألزهيمر بدرى بدرى..ودماغى صدت وبقت عاملة زى صفيحة الزبالة المخرومة
فاكرين زمان...لما كانت بتعصلج وكنت بأقعد أضربها فى الحيطة عشان تشتغل...حتى ده ماعدش نافع..ليه بقى..أصل أمى عقبال أملتكم عملت جمعية مع أم عبير جارتنا وبيضت الشقة....يعنى مش لو خبطت دماغى فى الحيطة...ده أنا لو حطيت إيدى بس عليها..هترمينى من البلكونة زى ما رميوا أشرف مروان...ومش بعيد ترمى أبويا واخواتى ورايه
بس هو إيه اللى جاب سيرة أشرف مروان وأم عبير..يادى النيلة السودا..هو أنا كنت باتكلم فى إيه أساسا..اللهم صلى ع النبى...آه أفتكرت الله يخرب بيت الألزهيمر...والله يا جماعة جربت كل الأدوية..خدت أركاليون..وجنسنج..حتى الأنتوسيد جربته..يعنى أروح أعمل عملية زرع مخ ولا إيه بس ياربى..
أنا خلاص ماعدتش هاخنوء عليكم تانى..الشعب ده مش ناقص خنوئه..كفاية عليه خنئ واحد
عشان كده أنا قررت إنى مش هاكتب تانى...هسيبكم للواد كريم يقعد يستخف عليكم لغاية مايجبلوكم الضغط
ولما أبقى أوحشكم إبقوا أفتحوا حاجاتى القديمة واقروها..واقرولى الفاتحة
الوداع ياجمهورى الحبيب..الوداع يا صحابى وأهلى وخلانى
الوداع يا أهلى وحبايبى والمجتمع والناس..
الوداع ياأمه..وإبقى خلى البياض ينفعك..عشان تبقى تصوتى كويس

كان معكم من فوق كوبرى الجامعة..جامعاوى
ملحوظة..لو التحديث اتأخر هتلاقونى تحت الكوبرى

[size=25]الطريق إلى المصيف [/size]

فضلت قاعد تحت كوبري الجامعة مستني الفرج .. ونفسيتي زي الزفت بعد ما ألقيت خطاب التنحي الأخير .. وأعلنت اعتزالي الكتابة في الموقع .. لأن دماغي للأسف خذلتني ..وبقت عاملة زي الكوز المخروم.. وأمي ربنا يسامحها لما بيضت البيت والحيطة بقت طرية وملقتش حاجة أخبط فيها راسي عشان أكتب لكم ..الدنيا أشودت في ورري .. لامؤخذة قصدي ..أسودت في وشي .. سامحوني مش بقولوكم دماغي بقت عاملة زي القفل المصدي ..ونسيت الجمل والحروف ..ونسيت اسمي ..
وفجأة .. وأنا قاعد لوحدي .. فجأة يعني .. فجأة كده .. فجأة ها!!!
لقيت حد حط إيده على كتفي .. وقالي بصوت تخين .. تخين أوي.. زي صوت سونيا صبري في اغنية رجل المستحيل : ارجع يا جمعاوي .. ارجع!! مصر محتاجك!!
بصيت .. لقيته الواد كريم العيسوي...... فقولتله: بجد يا كريم مصر محتجاني؟!
قالي: لأ يا خويا .. ده أمك بعتاني وبتقولك الحيطة نشفت .. تعالى لو عايز تخبط دماغك فيها..
وبعدين أنا مش جاي عشان موضوع أمك ده .. أنا جاي عشان باقي البرتيته قالوا إن أنت نفسيتك تعبانة .. ودماغك بقيت فاضية .. وأفكارك خلصت.. فاتفقنا نطلع كام يوم مصيف قبل ما الكلية تبدأ .. ها قولت إيه؟؟
جمعاوي: ماشي يا عم أي حاجة .. أهو ألاقي صرفة في نفسي؟؟
كريم: خلاص المعلم بيقولك ..
جمعاوي: معلم .. معلم مين؟؟
كريم : قصدي البوس.. المهم .. استنى بكرة المغربية عند موقف المساكن .. كفر طهرمس .. اللي جنب الترعة عند ترعة الزمر
جمعاوي: هو في إيه يا عم!! .. هو احنا حنصيف في بوليعة؟!
كريم: لأ يا سيدي ما أنت فاهم إن أمن الدولة بيمسك الطلبة الإخوان في المصايف .. ف احنا قولنا نتخفي عشان نعرف نصيف .. خلاص .. مستنيينك .. صحيح قبل ما أنسى .. ابقى تعالى متنكر ..
جمعاوي: إزاي يعني؟؟ .. ألبس ست مثلاً؟؟
كريم: معرفش بقى .. البوس اللي قال كده .. عشان محدش يهرشنا.

ساعة الصفر .. من أمام المساكن..كفرطهرمس/عند الترعة

[b]رحت في المعاد والمكان المحدد .. لقيت العيال متنكرين بجد .. وقال أنا اللي كنت فاكرهم بيهزروا ..لقيت كريم لابس أفطان واسع مخطط وشايل على راسه صاج كحك .. والواد مروان سعيد لابس بيجامة كاستور ونظارة كبيرة عاملة زي نظارة اللحام .. والواد محسن قال يعني كأنه مش رايح مصيف فلبس في الحر بلوفر ووجاكت جلد..
[size=16]وجاءت ساعة الصفر .. وبدأنا التحرك .. وكانت نقطة التجمع الأولى عند عربية الكبدة بتاعت عم نصر الكلبجي .. وأثناء التظاهر بالأكل مر علينا الريس بتاعنا وقال لنا : احنا حنتقسم فريقين .. فريق سيتجه إلى شاطئ البيطاش .. والفريق الثاني سيتجه إلى الهانوفيل .. ثم يظبط كل فرد عوامة .. وحنتقابل كلنا في وسط الميا .. عند حدود ميناء "بين شيفع" و "بيت يم" .. قشطة يا رجالة؟؟
الجميع وهما لسه بياكلوا كبدة: قشطة يا ريس!!
الريس: خلاص .. كفاية .. سيبوا الكبدة بقى .. يلا يا رجالة ربنا معاكم..
فسأله الواد خالد عمر: يا ريس هو مفيش كلمة سر .. أو إشارة ببداية العملية؟؟
الريس: آه صحيح ..طيب خلاص .. بصوا الإشارة حنشغل
أغنية شعب إسكندرية .. بتاعة الواد حمو عباطة "يا زانقني وجنبك فاضي .. ازنقني كمان وأنا راضي"
اتقسمنا فريقين فعلاً .. ناس ركبت أتوبيس وناس ركبت ميكروباص .. وكنت أنا من اللي ركبوا الأتوبيس .. وركبنا جنب بعض .. بس كأن كل واحد لوحده .. ولما جا الكومسري يقطع التذاكر .. بص لنا .. وقالنا: أنتم مع بعض يا كباتن .. قولنا: لأ .. قالنا: شكلكم كأنكم رايحين تعملوا عملية وهذا قائدكم .. - قصده عليا- فقولتله : لأ يا عمو .. أنا حتدفع تذكرة واحدة .. مليش دعوة بيهم..
وصلنا شاطئ البيطاش .. كل واحد مشى لوحده كأننا منعرفش بعض .. غيرنا هدومنا .. وكل واحد ظبط عوامته .. وفجأة ..
الواد كريم العيسوي -فقري الواد ده على فكرة- لقيته بيصرخ: يا لهوي .. ألحقوني يا جماعة .. جريت عليه .. وقولتله: وطّي صوتك .. حتودينا في داهية!! .. قالي: ألحقني يا جمعاوي .. العملية فشلت ..العوامة فست!! .. العوامة فست!!
راح الواد خالد عمر صرخ : لأ .. العملية مش ممكن تفشل .. كريم..احنا حننفخ العوامة عند ميكانيكي ..
جمعاوي : احنا كده حنتوه عن بعض ..
كريم: لو بتحب أمك تعالى ..أنا مبعرفش أعوم .. وربنا حيسترها..ورحنا .. ننفخ العوامة ..
ف خالد دخل للميكانيكي .. وفجأة طلع يصرخ: مش ممكن.. البلف مش عايز يخش في العوامة .. البلف مش عايز يخش في العوامة ..
جمعاوي: حاول تاني معلش..
كريم: لأ سيبوني يا جماعة .. أنا حاحاول ..
جمعاوي: كريم .. كريم .. فاخدته في حضني ..وقولتله: خلي بالك من نفسك مصر محتجاك .. يا كيمو
خالد: -وعنيه مدمعة- تفتكر حننجح؟؟
جمعاوي -وعنيا مدمعة بس مش أوي-: ما فتكرش
وفجأة ..
لقيت اتنين زي الحيطان مسكونا أنا وخالد .. وواحد دخل دكان الميكانيكي مسك كريم ..
نقولهم: أنتم مين؟؟ في إيه ؟؟ احنا عملنا إيه؟؟ ومفيش حد بيرد .. وهما بيجرونا على عربية بوكس واقف قدامها ظابط .. فوقفونا قدامه .. صرخت في وشه .. احنا عملنا إيه؟؟
الظابط: احنا راصدين تحركاتكم كلها .. وصحابكم في الهانوفيل اتمسكوا زيكم..
جمعاوي: احنا كنا عايزين نصيف .. احنا أحرار في بلدنا .. ومش خدامين عندكم .. أنت فاهم
لقيته رزعني قلم على وشي .. وصرخ فيا: أخرس ياااااااا كلب
جمعاوي: طيب .. والله العظيم .. والله العظيم ما حسكت على كلمة.. أخرس دي
الظابط : ماشي ..متزعلش.. يلا يا كلب ..
جمعاوي: أهو كده!!
كريم العيسوي: على فين يا باشا
جمعاوي: يعني حيودينا الحديقة الدولية يا أبو مخ
الظابط: على أمن الدولة .. يا ولاد الـ..........[/size][/b]

_________________

القوانين العامة للمنتدى

NoThing 2 Say

Cool

منيش آخر حبيب يدخل مدينتك..ولا هتكونى يوم اخر حبيبة..داللى انكتب مفروط يا عنقود العنب..واللى انقرى غنيوة بس قصيرة..مشروخ يا ناى متغنيش..زعقك وجعنى آآه..ولا كفانيش Cool

موضوع: رد: جمعاوى الخميس ماي 01, 2008 8:17 pm

ألحقوا..جمعاوي اتمسك وراح أمن الدولة

كنت معصوب العينين جالسا القرفصاء.. عندما شعرت بأحدهم يجلس بجواري .. انتفضت مذعروا وأنا أصرخ .. أنت مين؟!!
- اهدا يا جمعاوي..أنا خالد عمر..
- خالد عمر..وأنا إيش ضمني إن أنت خالد عمر .. وبعدين أنا أساسا معرفش حد اسمه خالد عمر.
- يا بني أنا خالد ما تخفش..حتي بأمارة البلف في العوامة..
- أيوه البلف في العوامة..يبقي أنت خالد عمر فعلا..الله يخرب يبيتك..قعدت أقولك بلاش نصيف .. احنا مش مكتوبلنا فسح..أدينا روحنا في داهيه
- ولا داهيه ولا حاجه .. أنت بس سيبها على الله وهو هيحلها..
- تفتكر هيعملوا فينا إيه؟؟
- ولا حاجة..أنت شفت فيلم احنا بتوع الأتوبيس
- لأ
- طب شفت الكرنك
- برضه لأ
- طب شفت البرئ
- ياعم أنا الفيلم الوحيد اللي شفته هو فيلم الحمار والتنين
- حلو أهو انت بقي هتبقي الحمار
- الحمار؟؟.. إزاي يعني؟؟ ..لأ.. كله إلا كده..
- يابني ما تفهمش غلط..أنا قصدي ان همه هيربطوك في الحنطور .. وحيحنطروك
- جامعاوي السيد جامعاوي..هكذا هتف المخبر ينادي علي اسمي.. سحبني من يدي..وأخذ يمشي بي في ممرات ودهاليز..وسلالم تشيلني..وسلالم تحطني..فيــــــن لقيته بيقعدني علي كرسي خشب وواحد ذو صوت أجش صارم يخاطبني ويقول..
- إزايك يا جمعاوي؟..كويس؟؟..
-الحمد لله يافندم..بس الغمامة دي مضايقاني شوية..
-توء .. توء .. إزاي يعملوا كدة الحيوانات دول؟! ..وادي الغمامة يا سيدي..
-وجدت نفسي في غرفة مظلمة خاليه من الأثاث إلا مقعدي ومكتب أمامي بينما أخذ الضابط يدور حولي وهو ينفث دخان سيجارته ثم وضع يده علي كتقي ومال عليّ قائلا :قولي بقي يا جمعاوي آخر مرة شفت فيها أبو طلحة الأفغاني كان إمتي؟؟
-أبو طلحة مين يا فندم؟!!!
-أبو طلحة الأفغاني يا روح خالتك..إيه.. مانتش عارف؟!!!
- يا فندم أنا أعرف جمال الدين الأفغاني..الحشيش الأفغانى..لكن أبو طلحة الأفغاني دة أنا أول مرة اسمع عنه
-طب بلاش أبو طلحة .. الأسلحة فين؟؟
-أسلحة.. أسلحة إيه يافندم..ده أنا عمري مامسكت مسدس ده أنا حتي وأنا صغير أبويا كان بيجيب لإخواتي كلهم مسدسات ويجبلي أنا عروسة
-طب بلاش الأسلحة..المتفجرات فين؟؟
-يانهار أسود متفجرات..ده أنا بخاف من البومب..والله يا فندم أنا معرفش حاجه عن الكلام ده..من الواضح إن في سوء تفاهم
-آآآه سوء تفاهم..لأ..أنا بقي اللي هوريك سوء التفاهم..ثم صرخ بعلو حسه :كهربا يا جابر
ودخل جابر..حاجة كدة شبه باب القلعة ..أو تلاجة 48 قدم .. شلاضيمه..اللي هي الشفايف عندنا..فوقها مكنسة سودا زعف كشبه الشنب..بينما يكشف فمه عن فك .. أشبه بالفك المفترس يتساقط منه اللعاب كالذئاب المسعورة .. نظر إليّ جابر نظرة مخيفه جعلتنى أشعر في ملابسي بشعور نسيته منذ أن كان عمري سنتين
ملت علي الضابط مستفسرا : مين ده يا فندم؟؟!!
-ده .. ده يا سيدي اللي أكل دراع "فان دام" في فيلم "تايتنيك"
-ازدرت ريقي في صعوبة ثم قلت :طب هو إيه اللي جايبه دلوقتي ..هو لسه ماشبعش
-لأ..ده جاي يكمل الفيلم .. بص بقي ..أنا عندي هنا كهربا متوصلة م السد العالي مباشرة لو لمّستها فيك هرجعك عيل في بطن أمك
-طب وحضرتك حتستفاد إيه لما ترجعني في بطن أمي؟؟ .. ده حتي مش هتعرف تكمل التحقيق .. وبعدين حضرتك أمي ست كبيرة معديه الستين يعني ماهياش أد حمل و ولادة من تاني
-خلاص... يبقي ترحمها وتتكلم
-خلاص يا فندم بدام الموضوع وصل للأم يبقي أنا هعترف بكل حاجه: هو منه لله خالد عمر هو اللي فسا العوامه.. أنا قولتله يا خالد ما تفسيش العوامه..أنت ماعندكش إخوات بنات.. لكن هو ماسمعش كلامي وفساها.. راح مروان حفرله حفرة في الرملة ووقعه فيها.. ساعتها بقي كان محمود ماجد مأجر بيتش باجي عشان يروح يجبلنا بيه أكلة سمك .. بس كان ماعهوش بطاقة فأخذ بطاقة إسلام وداها للراجل .. قوم لما محمود اتأخر .. الراجل خد هدوم إسلام المتعلقة في الشمسية فلما جه محمود .. إسلام قاله : أنت بستهبل يا محمود؟؟ .. إيه اللي أخرك؟؟ .. قاله: كنت بلف بالبيتش باجي شوية يا أخي!! .. وبعدين أنت شريكي؟! .. فإسلام اتغاظ فرمى شبشب محمود في البحر .. فمحمود حب ينتقم منه .. فعمله سندوتش جبنة بالخنافس .. وإسلام كان فاكره زتون فأكله .. فلما عرف قعد يرجع على هدوم خالد عمر .. اللي كان فسى العوامة.
- بس .. هي دي كل الحكاية يا سعادة البيه .. وأنا والله برئ

"تم إخلاء سبيلي من سرايا النيابة لعدم وجود تهمة بعد أن تأكدت النيابة أن البلف فعلاً مش عايز يخش في العوامة .. وقد أحيل الضابط للعمل بقسم المطافي .. بعد أن أصيب بنوبات عصبية من التحقيق معي"

كان معكم من مقر أمن الدولة
أبو طلحة الجمعاوي

_________________

القوانين العامة للمنتدى

NoThing 2 Say

Cool

منيش آخر حبيب يدخل مدينتك..ولا هتكونى يوم اخر حبيبة..داللى انكتب مفروط يا عنقود العنب..واللى انقرى غنيوة بس قصيرة..مشروخ يا ناى متغنيش..زعقك وجعنى آآه..ولا كفانيش Cool

موضوع: رد: جمعاوى الخميس ماي 01, 2008 8:40 pm

ههههههههههههه

جامدهياض يا حوده
_________________

i am back for the 2nd time ia a row

موضوع: رد: جمعاوى الخميس ماي 01, 2008 8:57 pm

اى خدعة

هات بريزة بقى

هع هع هع
_________________

القوانين العامة للمنتدى

NoThing 2 Say

Cool

منيش آخر حبيب يدخل مدينتك..ولا هتكونى يوم اخر حبيبة..داللى انكتب مفروط يا عنقود العنب..واللى انقرى غنيوة بس قصيرة..مشروخ يا ناى متغنيش..زعقك وجعنى آآه..ولا كفانيش Cool

موضوع: رد: جمعاوى الخميس يونيو 19, 2008 11:14 pm

هههههههههههههههههههههههههههههههههههه

جامدة مووووووووووووووووووووووووووووووت

شكرا على الموضوع يا عارف
_________________

don't see the past**just**think about your future

Like a Star @ heaven

موضوع: رد: جمعاوى الخميس يوليو 10, 2008 10:53 am

هوه انا فيييييين ومنين واسم اية واسم مرات عم خال ام ست ابويا اية
_________________

~*¤ô§ô¤*~samar~*¤ô§ô¤*~

موضوع: رد: جمعاوى الخميس يوليو 17, 2008 2:02 am

مسعد

_________________

القوانين العامة للمنتدى

NoThing 2 Say

Cool

منيش آخر حبيب يدخل مدينتك..ولا هتكونى يوم اخر حبيبة..داللى انكتب مفروط يا عنقود العنب..واللى انقرى غنيوة بس قصيرة..مشروخ يا ناى متغنيش..زعقك وجعنى آآه..ولا كفانيش Cool

موضوع: رد: جمعاوى الخميس يوليو 17, 2008 9:43 pm

مسعد ربنا يسعدك اكتر واكتر
_________________

~*¤ô§ô¤*~samar~*¤ô§ô¤*~